Ahmed Faraz Ghazal Mujmuaa!

[whiteros]

Ratjagay hoN K bhar poor neeNdein musalsal use dekhna
Wo jo aNkhoN mein hai aur aaNkhon se ojhal use dekhna

Is kaRi dhoop mein dil tapakte hain aur baam par woh nahi
Kal naye mausamoN mein jab aayeNge baadal use dekha

Wo jo khushbu bhi hai aur jugnu bhi hai aur aaNsu bhi hai
Jab hawa gunguaanyegi, naache ga jangal use dekhna

Jo hawaoN mein hai aur fezaoN mein hai aur duaoN mein hai
Koi phailaaye daaman, K lahraaye aaNchal use dekhna

Shairi mein bhi us jaan-e-jaaN ka saraapa samaata nahi
Aur aaNkhoN ki dereena khaahish!! mukammal use dekhna

Yeh bhi kya sochnaa hai K har waqt naadaaN use sochna
Yeh bhi kya dekhna hai K har samt paagal use dekhna

Shaam-e-wada sahi, dukh zeyada sahi, phir bhi dekho ‘Faraz’
Aaj shab uski furqat mein kah lo ghazal, kal use dekhna

wah bohat khoob

 

[shzd]

goood

 

[AnadiL]

Sab log liye sang-E-malaamat nikal aaye


Kis shahr meN ham ahal-E-muhabbat nikal aaye


Ab dil kii tamannaa hai to ai kaash yahii ho


AaNsuu kii jagah aaNkh se hasarat nikal aaye


Har ghar kaa diyaa gul na karo tum K na jaane


Kis baam se Khurashiid-E-Qayaamat nikal aaye


Jo dar_paa-E-pindaar haiN un qatl_gahoN se


JaaN deke bhii samajho K salaamat nikal aaye


Ae ham_nafaso kuchh to kaho ahad-E-sitam kii


Ek harf se mumkin hai hikaayat nikal aaye


Yaaro mujhe masaluub karo tum K mere baad


Shaayad K tumhaaraa qad-O-qaamat nikal aaye

 

[AnadiL]

Gaisu-E-shaam meN aik sitaaraa aik khyaal
Dil meN liye phirte haiN tumharaa aik khyaal


Baam-E-falak par sooraj,chaaNd, sitaara tha
Ham ne beyaaz-E-dil pe utaaraa aik khyaal


Kabhi to un ko bhi dekho, jin logoN ne
Umr gaNwaai aur saNwaaraa aik khyaal


Yaad k shahr k shor se kaale kosoN door
Dasht-E-faraamoshi se pukaaraa aik khyaal


YuN bhi hua hai dil k muqaabil duniya thi
Phir bhi na haaraa phir bhi na haaraa aik khyaal


Mujh par zarb paRi to khalqat ne dekha
Meri bajaaye paaraa paaraa aik khyaal


Aik musaafat, aik udaasii, aik ‘Faraz’
Aik tamannaa, aik sharaaraa, aik khyaal

 

[AnadiL]

Main mar mita to wo samjha ye inteha thi meri
Usay khabar hi na thii, khaak kimiya thi meri

MaiN chup hua to wo samjha k baat khatam hui
Phir us k baad to aawaaz ja ba ja thi meri

Jo taa’na zan tha meri poshish E dardidaa par
Usi ke dosh pay rak_khi houi qaba thi meri

MaiN us ko yaad karuN bhi to yaad ata nahiN
MaiN us ko bhool gaya huN, yahi saza thi meri

Shikast de gaya apna Ghoroor hi us ko
Wagarna us k muqabil basaat kya thi meri

KahiN dimaGh kahiN dil kahiN badan hi badan
Har ek se dosti yaari juda juda thi meri

Koi bhi koo E muhabbat say phir nahin guzra
To shahr E ishq maiN kya akhri sada thi meri

Jo ab ghamand say Sar ko uThaaye phirti hai
Isi tarah ki to makhlooq khaak E pa thi meri

Har aik shair na tha dar khor E qaseeda dost
Aur us say tab’ae E rawaaN khub aashna thi meri

MaiN usko dekhta rahta tha hairatoN se ‘Faraz’
Ye zindagi se ta’aaruf ki ibtedaa thi meri

 

[AnadiL]

Avval avval ki dosti hai abhi
Ek Ghazal hai K ho rahi hai abhi

MaiN bhi shahr-E-wafa meN nau-vaarid
Wo bhi ruk ruk ke chal rahi hai abhi

MaiN bhi aisa kahaN ka zood-shanaas
Wo bhi , lagta hai , sochti hai abhi

Dil ki waaraftagi hai apni jagah
Phir bhi kuch ehteyaat si hai abhi

Gar-cheh pehle sa ijtenaab nahiN
Phir bhi kam kam sapurdagi hai abhi

Khud-kalaami meN kab ye nash_sha tha
Jis tarah ru-ba-ru koi hai abhi

QurbateN laakh khoobsoorat hoN
DooriyoN meN bhi dil-kashi hai abhi

Raat kis maah-wash ki chaahat meN
ShabnamistaaN saja rahi hai abhi

MaiN bhi kis vaadi-e-khayaal mein tha
Barf si dil pe gir rahi hai abhi

Zindagi koo-E-na-muraadi se
Kisko muR muR k dekhti hai abhi

Is qadar khiNch gayi hai jaaN ki kamaaN
Aisa lagta hai TooTti hai abhi

Kaisa mausam hai kuchh nahiN khulta
BooNda baNdi thi, dhoop bhi hai abhi

Aisa lagta hai khalvat-E-jaaN meN
Wo jo ik shakhs tha wohi hai abhi

MuddateN ho gayeeN ‘FARAZ’ magar
Wo jo deewaangi k thi, hai abhi

 

[AnadiL]

Chalo K kuchaa-E-Dildar chal ke dekhtay haiN
Kisay kisay hai ya aazaar chal ke dekhtay haiN


Suna hai aisa masihaa kahiN say aayaa hai
K us ko shahr k beemaar chal ke dekhtay haiN


Hum apnay but ko , ZuleKha leye hai Yusuf ko
Hai kon rounaq-E-baazaar chal ke dekhtay haiN


Suna hai dair-O-haram maiN wo ab nahi milta
So abke us ko sar-E-dar chal ke dekhtay haiN


Us aek shaKHs ko dekho to aaNkh bharti nahi
us aek shaKHs ko har bar chal ke dekhtay haiN


Wo meray ghar ka karay qasd jab to saaye say
Kayee qadam dar-O-deewar chal ke dekhtay haiN


‘Faraz’ aseer hai us ka K woh Faraz ka hai
Hai koun kis ka griftaar? chal ke dekhtay haiN

 

[AnadiL]

Us ko judaa hue bhii zamaanaa bahut huaa
Ab kyaa kaheN ye qissaa puraanaa bahut huaa

Dhalatii na thii kisii bhii jatan se shab-e-firaaq
Ae marg-e-naagahaaN teraa aanaa bahut huaa

Ham Khuld se nikal to gaye haiN par ae Khudaa
Itne se vaaqa’ay kaa fasaanaa bahut huaa

Ab ham haiN aur saare zamaane kii dushmaanii
Us se zaraa sa rabt baRhaanaa bahut huaa

Ab kyoN na zindagii pe muhabbat ko vaar deN
Is aashiqii meN jaan se jaanaa bahut huaa

Ab tak to dil ka dil se ta’aaruf na ho sakaa
Maanaa ki us se milanaa milaanaa bahut huaa

Kya kya na ham Kharaab hue haiN magar ye dil
Ae yaad-e-yaar teraa Thikaanaa bahut huaa

Kahtaa thaa naasehoN se mere muuNh na aa_iiyo
Phir kya thaa ek huu kaa bahaanaa bahut huaa

Lo phir tere laboN pe usii bevafaa kaa zikr
Ahmad ‘Faraz’ tujh se kahaa naa bahut huaa

 

[AnadiL]

Gile fuzuul the ahad-e-vafaa ke hote hue
So chup rahaa sitam-e-naaravaa ke hote hue


Ye qurbatoN meN ajab faasale paRe k mujhe
Hai aashnaa kii talab aashnaa ke hote hue


Vo hila-gar haiN jo majburiyaaN shumaar kareN
ChiraaGh ham ne jalaaye havaa ke hote huye


Na kar kisii pe bharosaa ke kashtiyaaN DuubaiN
Khudaa ke hote huye naaKhudaa ke hote huye


Kise Khabar hai ki kaasaa-ba-dast phirte haiN
Bahut se log saroN par humaa ke hote hue


‘Faraz’ aise bhii lamhe kabhii kabhii aaye
K dil giriftaa rahaa dil_rubaa ke hote hue

 

[AnadiL]

Dil munaafiq tha shab-e-hijr maiN soyaa kaisaa
Aur jab tujh se milaa toot ke royaa kaisaa


Zindagi meN bhi ghazal hi ka Qareenaa raK_khaa
Khaaab dar khaab tere gham ko piroyaa kaisaa


Ab to chehroN pe bhi katboN ka ghumaaN hota hai
AankhaiN patth_raayi hui haiN lab-e-goyaa kaisaa


Dekh ab qurb ka mausam bhi na sar sabz lage
Hijr hi hijr maraasim maiN samoyaa kaisaa


Aik aansoo tha ke dariya-e-nidaamat tha FARAZ
Dil se baibaak shanawar ko duboyaa kaisaa

 

[AnadiL]

Kuchh na kisii se boleNge
Tanhaayii meN ro leNge


Ham berahabaroN kaa kyaa
Saath kisii ke ho leNge


Khud to hue rusavaa lekin
Tere bhed na kholeNge


Jivan zahar bharaa saagar
Kab tak amrit gholeNge


NiiNd to kya aayegi ‘Faraz’
Maut aayii to so leNge

 

[AnadiL]

Ye kyaa k sab se bayaaN dil kii haalateN karnee
‘Faraz’ tujh ko na aayiiN muhabbateN karnee

Ye qurb kyaa hai ke tuu saamane hai aur hameN
Shumaar abhii se judaayii kii sa’ateN karnee

koyi Khudaa ho k patThar jise bhii ham chaaheN
Tamaam umr usii kii ibaadateN karnee

Sab apane apane qariine se muntazir us ke
Kisii ko shukr kisii ko shikaayateN karnee

Ham apane dil se haiN majabuur aur logoN ko
Zaraa sii baat pe barpaa qayaamateN karnee

MileN jab un se to mubham sii guftaguu karanaa
Phir apane aap se sau-sau vazaahateN karnee

Ye log kaise magar dushmanii nibhaate haiN
HamiiN ko raas na aayiiN muhabbateN karnee

Kabhii ‘Faraz’ naye mausamoN meN ro denaa
Kabhii talaash puraanii raqaabateN karnee

 

[AnadiL]

Juz teray koi bhi din raat na janay meray
Tu kahaN hai magr Ae dost puranay meray

Tu bhi khushboo hai magr mera tujusus bekar
Burg-e-awara ki maninth dikhAnay meray

ShamA ki lau thi k wo tu tha magr hijr ki raat
Dair tak rotA raha koi sarhanay meray

Khalq ki beKhabaree hai k meree ruswayee
Log mujh ko hi sunatay hain fasanay meray

Lut k bhi khush huN k ashkoN se bhara hai daaman
Dekh gharat gar e dil yeh bhi khazane meray

Aaj ik aur baraS beet gaya us kay beghair
Jis k hotay hue hotay thay zamanay meray

Kaash tu bhi meri aawaaz kahiN sunta ho
Phir pukara hai tujhe dil ki saada ne meray

Kaash tu bhi kabhi aajaye masihayee ko
Log aate hain bahut dil ko dukhane meray

Kaash auroN ki tarah main bhi kabhi keH sakta
Baat sun lee hai meri, aaj khuda ne meray

Tu hai kis haal mein aih zood-faramosh mere
Mujh ko to chheen liya ahd-e wafa ne meray

Chara-gar yuN to bahut haiN magr ae jaan-e-faraz
Juz teray aur koi zakhum na janay meray

 

[AnadiL]

Ranjish hi sahi, dil hi dukhaanay k liye aa
Aa phir se mujhay chhoR k jaanay k liye aa

Pahlay se maraasim na sahi phir bhi kabhi to
Rasm-o-rah-e-dunya ko nibhaanay k liye aa

Kis kis ko bataayaiNge judaayi ka sabab ham
Tu mujh se Khafa hai to zamaanay k liye aa

Kuchh to meray pindaar-e-mohabbat ka bharam rakh
Tu bhi to kabhi mujh ko manaanay k liye aa

Ek umr se huN lazzat-e-giryaa se bhi mahrum
Ai raahat-e-jaaN mujh ko rulaanay k liye aa

Ab tak dil-e-Khush fahm ko haiN tujh se umeedaiN
Yeh aaKhri sham’eiN bhi bujhaanay ki liye aa

Maanaa k muhabbat ka chhupaanaa hai muhabbat
Chupke se kisi roz jataane ke liye aa

Jaise tujhe aate hain na aane ke bahane
Waise hi kisi roz na jaane ke liye aa

 

[AnadiL]

Us ko judaa hue bhii zamaanaa bahut huaa
Ab kya kaheN ye qissaa puraanaa bahut huaa

Dhalatii na thii kisii bhii jatan se shab-e-firaaq
Ai marg-e-naagahaaN teraa aanaa bahut huaa

Ham Khuld se nikal to gaye haiN par ae Khudaa
Itane se vaaqaye kaa fasaanaa bahut huaa

Ab ham haiN aur saare zamaane kii dushmaanii
Us se zaraa saa rabt baDhaanaa bahut huaa

Ab kyoN na zindagii pe muhabbat ko vaar deN
Is aashiqii meN jaan se jaanaa bahut huaa

Ab tak to dil ka dil se taarruf na ho sakaa
Maanaa k us se milanaa milaanaa bahut huaa

Kya kya na ham Kharaab hue haiN magar ye dil
Ae yaad-e-yaar teraa Thikaanaa bahut huaa

Kahtaa thaa naasehoN se mere muuNh na aa_iio
Phir kyaa thaa ek huu kaa bahaanaa bahut huaa

Lo phir tere laboN pe usii bevafaa kaa zikr
Ahmad ‘Faraz’ tujh se kahaa naa bahut huaa!

 

[AnadiL]

Is se pahale ke be-vafaa ho jaayeN
KyuN na ae dost ham judaa ho jaayeN

Tuu bhii hiire se ban gayaa pat_thar
Ham bhii kal jane kya se kya ho jaayeN

Tuu ke yakta tha, be-shumar hooa
Ham bhii tooteN to jabaja ho jaayeN

Ham bhii majbuuriyoN ka uzr kareN
Aur kahiiN aur mubtalaa ho jaayeN

Ham agar manzileN naa ban paayeN
ManziloN tak kaa raastaa ho jaayeN!!

Dair say soch meiN haiN parwaanay
Rakh ho jaayeN, ya hawaa ho jaayeN

Ishq bhii khel hai nasiibo.n kaa
Khaak ho jaaye.n kimiyaa ho jaaye.n

Ab ke gar tuu mile to ham tujh se
Aise lipTeN terii qabaa ho jaayeN

Bandagii ham ne chhoR dii hai ‘Faraz’
Kyaa kareN log jab Khudaa ho jaayeN

 

[AnadiL]

Teri bataain hi sunaanay aaye
Dost bhi dil hi dukhaanay aaye

Phool khilte hain to hum sochte hain
Tere aanay ke zamaanay aaye

Aisi kuch chup si lagi hai jaise
Hum tujhe haal sunaanay aaye

Ishq tanha hai sar-e munzil-e ghum
Kaun yeh bojH uthaanay aaye

Ajnabi dost humeN dekh! keh hum
Kuch tujhe yaad dilaanay aaye

Dil dharakta hai safr ke hungaam
Kaash phir koi bulaanay aaye

Ab to ronay se bhi dil dukhta hai
Shayed ab hosh thikaanay aaye

Kya kaheeN phir koi basti ujRi
Log kyoN jashun manaanay aaye


So raho maut ke pahlU mein Faraz

Neend kis waqt na jaanay aaye

 

[AnadiL]

Ab ke tajdiid-e-vafaa kaa nahiin imkaaN jaanaaN
yaad kyaa tujh ko dilaayeN teraa paimaaN jaanaaN

YuuN hii mausam kii adaa dekh ke yaad aayaa hai
Kis qadar jald badal jaate hain insaaN jaanaaN

Zindagii terii ataa thii so tere naam kii hai
Ham ne jaise bhii basar kii teraa ehasaaN jaanaaN

Dil ye kahataa hai ki shaayad ho fasurdaa tuu bhii
Dil kii kyaa baat karen dil to hai naadaaN jaanaaN

Avval-avval kii muhabbat ke nashe yaad to kar
Be-piye bhi tera cheharaa thaa gulistaaN jaanaaN

AaKhir aaKhir to ye aalam hai ki ab hosh nahiin
Rag-e-miinaa sulag uThii ki rag-e-jaaN jaanaaN

Muddaton se hai ye aalam na tavaqqo na ummiid
Dil pukaare hii chalaa jaataa hai jaanaaN jaanaaN

Ham bhii kyaa saadaa the ham ne bhii samajh rakhaa thaa
Gam-e-dauraaN se judaa hai Gam-e-jaanaaN jaanaaN

Ab kii kuchh aisii sajii mahafil-e-yaaraaN jaanaaN
Sar-ba-zaanuu hai ko_ii sar-ba-girebaaN jaanaaN

Har ko_ii apanii hii aavaaz se kaaNp uThataa hai
Har ko_ii apane hii saaye se hiraasaaN jaanaaN

jis ko dekho vahii zanjiir-ba-paa lagataa hai
Shahar kaa shahar huaa daaKhil-e-zandaaN jaanaaN

Ab teraa zikr bhii shaayad hii Gazal men aaye
Aur se aur huaa dard kaa unvaaN jaanaaN

Ham ki ruuThii hu_ii rut ko bhii manaa lete the
Ham ne dekhaa hii na thaa mausam-e-hijraaN jaanaaN

Hosh aayaa to sabhii Khaab the rezaa-rezaa
Jaise uDate huye auraaq-e-pareshaaN jaanaaN

 

[AnadiL]

Suna hai log use aaNkh bhar ke dekhte haiN
So us k shahr me kuch din Thahar ke dekhte haiN


Suna hai rabt hai us ko kharaab haaloN se
So apne aap ko barbaad kar ke dekhte haiN


Suna hai dard ki gaahak hai chashm-E-naaz us ki
So hum bhi us ki gali se guzar ke dekhte haiN


Suna hai us ko bhi hai shair-O-shayeri se shaGhaf
So hum bhi mo’jeze apne hunar ke dekhte haiN


Suna hai bole to batoN se phool jhaRte haiN
Yeh baat hai to chalo baat kar ke dekhte haiN


Suna hai raat usay chaaNd takta rahta hai
Sitaaray baam-E-falak se utar ke dekhte haiN


Suna hai din ko use titliyaaN sataati haiN
Suna hai raat ko jugnoo Thahar ke dekhte haiN


Suna hai hashr haiN us ki ghazaal si ankheN
Suna hai us ko hiran dasht bhar ke dekhte haiN


Suna hai raat se baRh kar haiN kaakulaiN us ki
Suna hai shaam ko saaye guzar ke dekhte haiN


Suna hai us ki siyah chashmagi qayaamat hai
So us ko surma-farosh aah bhar ke dekhte haiN


Suna hai us ke laboN se gulaab jalte haiN
So hum bahaar pe ilzaam dhar ke dekhte haiN


suna hai aaeenaa tamsaal hai jabeeN us ki
Jo saada dil haiN ussay ban saNwar ke dekhte haiN


Suna hai jab se hamaayal haiN us ki gardan meN
Mizaaj aur hi laa’l-O-guhar ke dekhte haiN


Suna hai chashm-E-tassavur se dasht-E-imkaaN meN
Palang zaawiye us ki kamar ke dekhte haiN


Suna hai us ke badan ki taraash aisi hai
K phool apni qabaayeN katar ke dekhte haiN


Bas ek nigaah se luT_ta hai qaafila dil ka
So reharwaan-E-tamanna bhi dar ke dekhte haiN


Suna hai us ke shabistaaN se muttasil hai bahisht
MakeeN udhar ke bhi jalway idhar ke ke dekhte haiN


Rukay to gardishaiN us ka tawaaf karti haiN
Chalay to us ko zamaanay Thahar ke dekhte haiN


MubaleGhe hi sahi, sab kahaaniyaaN hi sahi
Agar wo khaab hai, taa’beer karke dekhte haiN


Ab us k shahr me ThahreN k kooch kar jaayeN
‘FARAZ’ aao, sitaare safar ke dekhte haiN

 

[Ocean-of-love]

So nice.