Apne Ghar Ki Khirki Se Main Aasman Ko Dekhon Ga

  • Work-from-home

Fanii

‎Pяiиcε ♥
VIP
Oct 9, 2013
61,263
16,095
1,313
Moon
apne ghar ki khiRki se maiN aasman ko dekhuN ga
jis par tera naam likha hai us taare ko dhuunDuN ga

tum bhi har shab diya jala kar palkoN ki dehliiz pe rakhna
maiN bhi roz ik khwaab tumhare shahr ki jaanib bhejuuN ga

hijr ke dariya meN tum paRhna lehroN ki tehriireN bhi
paani ki har satar pe maiN kuChh dil ki baateN likhuuN ga

jis tanha se peR ke niiche ham baarish meN bhiige the
tum bhi us ko Chhuu ke guzarna maiN bhi us se liptuuN ga

Khwaab musafir lamhoN ke haiN saath kahaaN tak jaayeN ge
tum ne bilkul Thhiik kaha hai , maiN bhi ab kuch sochuuN ga

baadal oRh ke guzruN ga maiN tere ghar ke aangan se
qos-e-qaza ke sab rangoN meN tujh ko bhiiga dekhuuN ga

raat gaye jab chaand sitaare lukan miiTi kheleN ge
aadhi neeNd ka sapna ban kar maiN bhi tum ko Chhuu luuN ga

be mausam baarish ki suurat der talak or duur talak
tere diyaar-e-husn pe maiN bhii kin min kin min barsuun ga

sharm se dohra ho jaye ga kaan paRa voh bunda bhi
bad-e-Saba ke lehje meiN ik baat maiN aisi puuChhuuN ga

safha safha ek kitaab-e-husn si khulti jaaye gi
aur isii ki lau meN phir maiN tum ko azbar kar luun ga

vaqt ke ik kankar ne jis ko aksoN meN taqsiim kiya
aab-e-rawaN meN kaise Amjad ab voh chehra joRuuN ga
 
Top