Gunehgaar

  • Work-from-home

vamp545

Ì míśš ůř šťůpîđ fâćë
TM Star
Nov 29, 2012
2,278
722
413
Searching.....
As slaam alekum every one ummid hai sab theek thak honge
The dark girl and raaz k baad ek new stry k saath ek baar fir haaZir hoon aap logon ki khidmat mein "Gunehgaar" story k saath Jo suspence and thriller hai insha Allah aap sabko be hadd pasand Aaye gi
 
  • Like
Reactions: monimona_1990

vamp545

Ì míśš ůř šťůpîđ fâćë
TM Star
Nov 29, 2012
2,278
722
413
Searching.....
Update-1.

'shakal surat se sidha sada najar aane wala yah
shakhs asal me ek khunkhar hatyara hai my lord' sarkari vakil ne
katghare me khade karib 25 varshiya yuvak ki taraf apni ungli tante
huye kaha-'ajay shrivastav naam ke is shakhs ne anil garg naam ke
yuvak ka murder kiya hai'
'i object your honour' ajay ke vakil ne purjor andaz me kaha-'me apne
kabil dost ko yah salah dena chahta hu ki iljam lagane se pehle inhe
pata kar lena chahiye tha ki ye kiske bare me court me kya kehna
chahte hain aur haqikat ke dharatal par wah kitna thhehar sakega kyoki
mera clint ajay shrivastav aur wah...jiski hatya ka aarop mere clint
par lagaya ja raha hai yani anil garg aapas me bahut gehre dost rahe
hain aur...'
'yahi...me thhik yahi kehna chahta hu my lord' sarkari vakil ne turant
ajay ke vakil ki baat kaatkar kehna shuru kiya-'katghare me khade
shakhs ke liye mene khunkhar hatyara shabd isiliye istemal kiya tha
kyoki isne us shakhs ki hatya ki hai jo iska bahut hi gehra dost tha.
aise shakhs ke liye kanoon me...'
'yah sirf ek aarop hai your honour...sarasar jhuthha aur bebuniyad
aarop' ajay ka vakil ek baar fir cheekha-'haqikat se is aarop ka koi
sarokar nahi hai'
sarkari vakil ne ek baar fir kuchh kehne ke liye muh khola hi tha ki
nyay ki kursi par baithhe mister sudarshan chakravarti ne hath ke
ishare se use shant rehne ke liye kehne ke baad kaha-'sabse pehle
adalat yah janna chahti hai ki marhum anil garg ki hatya kab, kin
halaat me aur kaha hui?'
'baat 10 december 2004 ki hai my lord' sarkari vakil ne apna chonga
durust karne ke sath kaha-'anil garg ka qatl us sard raat ke thhik 11
bajkar 7 minut par khud maktool ke apne flat...balki bedroom me hua.
anil garg ka bedroom 'kamakshi' namak building ki dusbi manjil par
tha.
 

vamp545

Ì míśš ůř šťůpîđ fâćë
TM Star
Nov 29, 2012
2,278
722
413
Searching.....
'Dusri manjil ki khidki ka kanch todta hua anil
garg ka sharir sidha imarat ki service lane me jakar gira aur laash me
tabdeel ho gaya'
'to kya me jaan sakta hu- mera clint waha kaha se pahuch gaya?' ajay
ke vakil ne vyangpurvak puchha.
'pahucha aapka clint nahi tha, pahuch to waha achanak maktool gaya
tha' sarkari vakil ka lehja ajay ke vakil se bhi jyada vyangnatmak
tha-'police ki report ke mutabik aapka clint to waha pehle se hi
maujud tha'
'ajib baat kar rahe hain vakil sahab. bedroom anil garg ka tha- aur
pehle se waha ajay maujud tha. kya me jaan sakta hu- aisa kaise hua?'
'aisa yu hua vakil sahab ki aapke clint ke maktool ki biwi se avaidh
sambandh the' kehne ke sath sarkari vakil ne bahut teji se ghumkar
darshak deergha me baithhi ek aisi yuvti ki taraf dekha jiske tan par
vidhva ka libaas tha.
'ye jhuthh hai your honour...mere clint par bahut hi ghinauna,
bahiyaat aur sarasar bebuniyad aarop lagaya ja raha hai' ajay ka vakil
bifar gaya-' me adalat se darkhwast karunga ki court me kisi par bhi
aise aarop lagane se pehle hazar baar socha jana chahiye kyoki...'
'socha gaya hai my lord...hazaro baar nahi lakho baar socha gaya hai'
ek baar fir sarkari vakil ajay ke vakil ki baat kaatkar kehta chala
gaya-'adalat me jo bhi mere dwara kaha ja raha hai, bahut soch
samajhkar aur jinda sabooto ki roshni me kaha ja raha hai. aur use
sabit bhi kiya jayega'
'me apne kabil dost ko apna aarop sabit karne ki khuli chunauti deta
hu' ajay ke vakil ne kaha.
'karunga vakil sahab...yah bhi sabit karunga magar usse pehle me
adalat ko yah bata dena apna farz samajhta hu ki maqtool yani anil
garg ko ghatna wali raat ke karib ek mahine pehle se apne dost aur
biwi ke sambandho par shak tha. kekin sirf shak ke aadhar par wo na to
apne dost par aur na hi apni biwi par koi aarop laga sakta
tha'
 

vamp545

Ì míśš ůř šťůpîđ fâćë
TM Star
Nov 29, 2012
2,278
722
413
Searching.....
Sarkari vakil kehta gaya-'apne shak ki pushti ke
liye usne 10 December 2004 ko, company ke kaam se apna shahar se bahar
jana pracharit kar diya tha. usne socha ki agar mere shak me dum hai
to mujhe shahar se bahar jaankar dost aur biwi jarur milenge. wahi hua
my lord. raat ke 11 baje anil garg jab chhupta chhupata apne flat me
pahucha to apne dost aur biwi ko apne hi bed par aapattijanak stithi
me paya. aap samajh sakte hain my lord ye dekhkar anil garg par kya
gujri hogi. aape se bahar hokar wo dost aur biwi ko jane kya-2 kehne
laga. aisa kuchh ki jise sunkar dono ko sharm se gad jana chahiye tha,
magar hua iska ulta- pehle to khud ko range hatho pakda gaya dekhkar
ajay ke hosh ud gaye. magar 2-4 minut baad jab iski samajh me aaya ki
khel bigad gaya hai to anil ko baato me uljhakar yah use khidki ke
najdik le gaya aur mauka dekhte hi use itni jor se khidki par...'
'bahut khoov your honour...bahut khoov' is baar ajay ka vakil sarkari
vakil ke chup hone se pehle hi josh me bharkar kehta gaya-'mere kabil
dost apni sunai kahani ke jaal me khud fans gaye hain'
'wah kaise?'
'aapke kehne ka matlab hai ki jis waqt ghatna ghati, us waqt anil garg
ki patni bhi kamre me maujud thi?'
'beshak...me yahi kehna chahta hu'
'tab to gaflat ki koi baat hi nahi hai. maqtool ki biwi ranjana garg
isi court me maujud hai. kyo na hum unhi se puchh le ki us raat kya
hua tha?'
'yah sachchai bayan kyo karegi my lord? ek tarah se yah khud bhi is
jurm me barawar ki bhagidar hai. bhale hi khidki se dhakka isne na
mara ho magar is bhari adalat me bhala yah kaise qubool kar sakti hai
ki uske ajay se najayaj tallukat the?'
'bawajud iske...ranjana garg ke bayan mehatvpurn hain your honour
kyoki mere kabil dost ki kahani ke mutabik we is murder ki ek matra
chashmadeed gawah hain'
'insaf ke liye ye jaruri hai'
 

vamp545

Ì míśš ůř šťůpîđ fâćë
TM Star
Nov 29, 2012
2,278
722
413
Searching.....
Sudarshan chakravarti ki gambhir awaj gunji-'adalat
ranjana devi ko katghare me aakar bayan dene ka huqm deti hai'
unke is huqm ke baad sannata chha gaya aur sabki nigahe masum si najar
aane wali khubsurat ranjana par sthir ho gai.
aur fir...vidhwa uthhi.
dhime-2 kadmo se chalti katghare me pahuchi.
ajay ka vakil chehre par jeet ki chamak liye aatmvishwas se bharpur
kadmo ke sath katghare ke najdik pahucha aur bola-'sarkari vakil sahab
ka kathan aapne suna hi hoga ranjana devi. kya yah sach hai ki aapke
aur ajay ke...'
'i object my lord' baat puri hone se pehle hi sarkari vakil dahada-'me
ek baar fir kahunga ki ranjana devi is baat ko qubool nahi karengi.
isliye...'
'bawajud iske inka bayan mehatvpurna hai your honour kyoki bakaul mere
kabil dost ye ghatna ki ek matra chashmadeed...'
'vakil sahab ne thhik kaha judge sahab' ranjana vakil ki baat kaatkar
kehti chali gai-'me is ghatna ki chashmadid gawah hu. ajay ne mere
samne hi mere pati ko khidki par itna jor ka dhakka diya ki we use
todte huye niche ja gire aur unki maut hui'
ajay ke vakil ka chehra fakk.
paase puri tarah palat gaye the.
'ye kya keh rahi ho bhavi!' ajay cheekh pada.
'sarkari vakil ka ek ek lafj sahi hai' ajay ki cheekh chillahat par
dhyan diye bagair wo kehti gai-'mere aur ajay ke bich sambandh the.
unhi ki wajah se ye sab hua. aaj me apne pati se bewafai par sharminda
hu. mene khwab me bhi nahi socha tha ki iska ye natija hoga. me kulta
hu judge sahab. anil ki hatya ka jitna doshi ajay hai, utni hi me bhi
hu. na mene ajay se sambandh banaye hote aur na ye sab hota. mujhe
fansi par latka dijiye judge sahab mere jaisi aurat ko fansi par latka
dena chahiye' baar-2 aisa kehti wah foot-2 kar roti chali gai. ajay
aur uske vakil ke chehro par hawaiya ud rahi thi, wahi sarkari vakil
ke chehre par vijayi muskan thi.
 

vamp545

Ì míśš ůř šťůpîđ fâćë
TM Star
Nov 29, 2012
2,278
722
413
Searching.....
Update-2.
Sudarshan chbkravarti apne drying room me dakhil huye.
visitor chair par baithha aagantuk turant khada ho gaya.
sath hi, unhe abhivadan kiya usne.
chakravarti ne gardan hila kar abhivadan swikara aur mej ke dusri taraf padi revolving chair par baithhne ke sath use bhi baithhne ka ishara kiya. aagantuk baithh gaya.
uski umra karib 30 varsh aur lambai achchhi thi parantu motape ke karan madhyam kad kathhi ka najar aata tha. ankhe badi-2 thi.
chehra sanwala.
jane kyo pehli najar me sudarshan chakravarti ko wah jancha nahi. halanki surat se asabhya sa bhi najar nahi aa raha tha.
tej tarrar sa laga wah.
'kahiye' chakravarti ne mej ke niche pair failate huye puchha-'kya khaas baat thi jiske liye phone par tumne humse is mulaqat hetu itni request ki thi hum taal na sake'
'kal aap anil garg hatyakand ka faisla sunane wale hain' aisa usne chehre par puri gambhirta liye kaha tha.
jabki uske is ek matra vakya ne sudarshan chakravarti ki bhav bhangimaye taan di.
aagantuk ko dhyan se dekha unhone, kaha-'to?'
bada sanyamit najar aa raha tha wah.
chehre par kisi tarah ki hadbadahat nahi thi aur uski yah avastha sudarshan chakravarti ko thoda hairat me daal rahi thi. aksar log yaha chehre par vilaap liye aate the aur unko mom kar dene wale jitne hathkande we jante the, sabka istemal shuru kar dete the.
iske bipreet wah ekdum samanya tha.
apni aankhe sidhi chakravarti ki aankho me daal di usne aur bola-'mere khayal se faisla ajay ke khilaf jane wala hai!'
'jyada bhumika bandhne ki jarurat nahi hai, tumhe jo kehna hai kaho' chakravarti ka lehja khud va khud sakht hota gaya-'humare paas faltu baato ke liye waqt nahi hai. faisla kiske khilaf jayega yah court me pata chalega'
yuvak aise rehasmay tarike se muskuraya jaise unke kathan ko 'nadani bhara' samajh raha hai.
 

vamp545

Ì míśš ůř šťůpîđ fâćë
TM Star
Nov 29, 2012
2,278
722
413
Searching.....
uske is ravaiye se sudarshan chakravarti ki khopdi ka fuse uda diya tha.
aur...yah baat unke liye asahaniya thi.
samne baithha yuvak khud ko jarurat se jyada smart darshane ki koshish kar raha tha aur yah baat judge ko nagawar gujarne lagi.
itna waqt thode hi hota tha unke paas ki aise sarfiro se baat karte firen.
manavta ke naate we thoda sa samay kisi ko de diya karte the lekin yah yuvak to unhe pagal sa laga.
we kuchh kehne hi wale the ki yuvak ka swar kaano me pada-'mera khayal hai ki kal ki tarikh me aap ajay ko fansi ki saza sunane wale hain?'
'agar tum yaha yahi bakwas karne aaye ho to turant yaha se uthhkar chale jaao' gussa dimag par havi hone ke bawajud chakravarti ne apna lehja santulit rakha.
haan, kadi najaro se ghura jarur tha.
magar...nidarta ho to aisi.
paththha punah muskurakar bola-'chunki aap ek judge hain, isliye aap ko samajhna chahiye ki agar me yaha is andaz me aapse baat kar raha hu to iska jarur koi aadhar hoga'
'kya aadhar hai?'
'me chahta hu ki hum dono ke bich thhande dimag se baate ho'
halanki tha to yah sab sudarshan chakravarti ki shaan ke khilaf hi magar jane kya sochkar unhone khud ko shant rakha aur thhandi sans khichkar puchha-'kya kehna chahte ho?'
'ajay ko fansi ho gai to aapki sehat ke liye achchha nahi hoga'
ek baar fir chakravarti ne use sthir najaro se dekha. usne jitne saral andaz me yah baat kahi thi, shayad use anjam ka pata nahi tha warna aise shabd kadapi nahi bolta.
laga- shayad wah manasik taur par vichlit hai.
kuchh bhavnatmak rishte jude honge ajay se aur ajay ko maut ki giraft me pakar wah apna mansik santulan kho baithha hai.
bade hi santulit swar me puchha chakravarti ne-'agar humne use fansi ki saza suna di to tum kya karoge?'
'sabse pehle me yah chahta hu ki aapke aur mere bich jo bhram hain, we door ho jaye'
'matlab?'
 

vamp545

Ì míśš ůř šťůpîđ fâćë
TM Star
Nov 29, 2012
2,278
722
413
Searching.....
Wah samanya kintu dridh swar me kehta gaya-'mujhe lag raha hai ki aap mujhe koi bikshipt...koi sarfira ya koi mano rogi samajh rahe hain'
'aisa kaise soch liya tumne?' chakravarti jaise usse maza lene ke mood me aa gaye.
'agar aisa hai to turant is beham ko dimag se nikaal dijiye' unke mood aur baat par dhyan diye bagair wah apni dhun me kehta gaya-'me pure hosho hawaas me, swasth mansikta ke sath aapse yah sauda karne aaya hu ki aapko ajay ko ba-izzat bari karna hai'
'agar wah doshi paya jata hai tab bhi?' chakravarti mano ab bhi apne purane mood me the.
'doshi to wah paya hi ja chuka hai. tabhi to mujhe yaha aane ki jarurat padi. uske khilaf saboot hi itne hain ki...aur fir ranjana ke bayan ne to...'
chakravarti ne uski baat kaatkar kaha-'itne samajhdar hone ke bawajud tum chahte ho ki use saza nahi honi chahiye?'
'ji'
'kyo?'
'kyoki meri baat maankar aap us nuksan se bach sakte hain jo aapko bahut bhari padega'
sudarshan chakravarti ne bahut dhyan se use dowara dekha.
surat aur bhav se wah ladka sayana najar aa raha tha magar uske shabd is baat ki mukhalfat kar rahe the.
shabd use bikshipt thhehra rahe the...ya bewakuf.
ghurte-2 pareshani ke bhav khud chakravarti ke chehre par utar aaye the kyoki yuvak ki kism nahi jaan pa rahe the.
usi ko samajhne ki garj se puchha-'kya nuksan pahucha sakte ho tum hume?'
chakravarti ab bhi khud ko puri tarah aatmvishwas se bhara mehsus jata rahe the kyoki unko pura vishwas tha ki samne baithha sarfira shakhs unka kuchh nahi bigaad sakta.
jabki wah bola-'me chahta hu ki meri baat sunne ke baad aapki pratikriya buddhimani se lavlej honi chahiye. me jo bhi kahu, pehle aap us baat ki gehrayi ko samjhe, baad me koi reaction kare kyoki aapki jaldbaji aapko hi nuksan pahuchayegi'
chakravarti ke chehre par aise bhav ubhre jaise bahut kuchh kehna-
 

vamp545

Ì míśš ůř šťůpîđ fâćë
TM Star
Nov 29, 2012
2,278
722
413
Searching.....
-chahte ho magar apni garima banaye rakhne hetu bol na pa rahe ho.
sirf itna hi kaha-'tum kaho jo kehna chahte ho. hum najuk maslo par murkhta ka parichay nahi dete'
'mujhe yahi ummid thi aapse' kehkar wah ruka aur fir thoda thheharkar punah bola-'aapki pyari aur eklauti beti saint xeviur college me padhti hai...'
'to?' ek jhatke se sudarshan chakravarti na kewal kursi se khade ho gaye balki unke chehre ki sari rekhaye hi badal gai.
jabki unki avastha par koi dhyan diye bagair paththha apni dhun me kehta gaya-'use tab se thhik 15 minut pehle kidnap kar liya gaya tha jab mene aapki kothhi ki bell bajayi thi'
sudarshan ki muththhiya aur jabde bhinch gaye.
jaise sher gurraya-'kisne kiya aisa?'
wah bade samanya bhav liye pehle ki tarah baithha tha jaise kuchh hua hi na ho.
usi lehje me jawab diya usne-'jahir hai, ajay ke kisi shubh chintak ne kiya hoga'
uske kehne ke darmiyan hi chakravarti ne hath se diwar me laga ek switch 2 baar daba diya tha.
idhar yuvak ne baat puri ki, udhar 'bhadaak' se darwaja khula aur ek gunman gun taane andar dakhil hua.
gun ki naal palak jhapakte hi yuvak ki kanpati ka naap leti najar aayi.
sath hi gunman gurraya-'hands up'
yuvak pura ka pura khada ho gaya. hath bhi upar uthha liye the usne.
hothho par muskan ka katthak jaari rakhe puchha paththhe ne-'kya itne najuk masle par aapne murkhta ka parichay dene ka faisla kiya hai?'
'stupid' dahad uthhe sudarshan chakravarti.
aankhe shole ugal rahi thi.
gunman se kaha-'ise bahar wale kamre me le chalo'
**********
Wah ek bina hatthe ki kursi se bandha baithha tha.
dono hath kursi ki pusht ke pichhe bandhe the.
tango ko kursi ki dono tango se bandh diya gaya tha aur sharir kursi ki pusht se jakad diya gaya tha.
yah kaam 2 gunmano no kiya tha- ek ne uski khopdi par gun rakhi aur dusre ne use bandha tha.
 

vamp545

Ì míśš ůř šťůpîđ fâćë
TM Star
Nov 29, 2012
2,278
722
413
Searching.....
Unko ummid thi ki yuvak pratirodh karega- chhootkar bhagne ki koshish karega. magar yuvak ne unki shankao par tusharaghat kar diya.
wah aise befikra tha jaise dahej lobhiyo ke chungal se nikal kar koi beti peehar aa gai ho.
unhone bandha aur wah aaram se bandhta chala gaya.
is bich judge sahab ne college phone kar liya tha. waha se mila jawab sunkar unke hosh faakta ho gaye the. agla phone thane kiya aur phone par hi apharan ki report darj kara di. sath hi police inspector ko apne ghar aane ka nirdesh de diya tha.
********
Bhuri aankho aur lambe chehre wale 6 foote inspector ne yuvak ko kha jane wali najaro se ghurte huye policiya gurrahat ke sath kaha-'sabse pehle apna naam bata?'
'siman desuja'
'ye apharan kisne kiya?'
'jahir hai- ajay ke kisi shubhchintak ne kiya hoga' wah nape tule shabdo me bola.
'kaha le gaye kidnap karke?'
'le jane walo ke alawa koi nahi janta' kehkar usne shikayati aur vyanganatmak najaro se judge sahab ko dekha.
kamre me sirf 3 log the- siman, police inspector, aur judge sahab.
siman chakravarti ki taraf dekhta hua bola-'aap murkhtapurna kaam kar rahe hain judge sahab'
sudarshan chakravarti ki halat ka kya bayan kiya jaye?
aankhe sulag rahi thi. chehra tamtama raha tha.
khud ko samanya darshane aur buddhimani ki form rakhne ki we bharsak cheshta kar rahe the parantu mamla aisa tha ki form me se nikal-2 jate the.
ek hi to beti thi unki. unki jaane jahaan. bachpan me hi maa ka saya sar se uthh gaya tha.
sudarshan chakravarti ne apni masoom 6 maah ki 'ronak' ko maa ka pyar dene ki bhi koshish ki thi.
sirf koshish ki thi.
asal me maa ka pyar dena unke liye usi tarah asambhav tha jis tarah raat ke 12 baje chilchilati dhoop ka khilna.
aur aaj- unke dil ka wah tukda itni badi musibat me fans gaya tha ki unhe kuchh soojh nahi raha tha.
 
Top