شامِ فراق، اب نہ پوچھ، آئی اور آ کے ٹل گئی

[Guriya_Rani]

شامِ فراق، اب نہ پوچھ، آئی اور آ کے ٹل گئی​

دل تھا کہ پھر بہل گیا، جاں تھی کہ پھر سنبھل گئی​

بزمِ خیال میں ترے حُسن کی شمع جل گئی​

درد کا چاند بُجھ گیا، ہِجر کی رات ڈھل گئی​

جب تُجھے یاد کر لیا، صُبح مہک مہک اٹھی​

جب ترا غم جگا لیا، رات مچل مچل گئی​

دل سے تو ہر معاملہ کر کے چلے تھے صاف ہم​

کہنے میں ان کے سامنے بات بدل بدل گئی​

آخرِ شب کے ہمسفر فیض نجانے کیا ہوئے​

رہ گئی کس جگہ صبا، صُبح کدھر نکل گئی​

​

فیض احمد فیض​