عشق منّت کشِ قرار نہیں

[Guriya_Rani]

عشق منّت کشِ قرار نہیں​

حُسن مجبورِ انتظار نہیں​

تیری رنجش کی انتہا معلوم​

حسرتوں کا مری شمار نہیں​

اپنی نظریں بکھیر دے ساقی​

مے باندازۂ خمار نہیں​

زیر لب ہے ابھی تبسمِ دوست​

منتشر جلوۂ بہار نہیں​

اپنی تکمیل کر رہا ہوں میں​

ورنہ تجھ سے تو مجھ کو پیار نہیں​

چارۂ انتظار کون کرے​

تیری نفرت بھی اُستوار نہیں​

فیض زندہ رہیں وہ ہیں تو سہی​

کیا ہوا گر وفا شعار نہیں​

​

فیض احمد فیض​