Aslaam O Allaykum
palkeiN nam rehne lageiN, dil wehshatoN se bhara ho, jaise bisaat-e-jaaN pe azaab se utar aaey hoN. Beqarari chalknay ko beqarar ho to dil chahta hai k kisi bhi tarah iss meiN bhari ghutan baahir niklay.
Kuch log aisay meiN maar DhaaRh par bhi utar aatay haiN lakin baa-zouq log inn baatoN se duur bhagtay haiN aur woh apnay jazbaat ko sirf aur sirf alfaaz ki soorat biyaan kartay haiN. Rooh ki gehraiyoN se niklay yeh alfaaz suchay motiyoN ki tarah aik laRi meiN piroay jaayeN to beqarari k yeh jazbaat sher ki soorat dhal jatay haiN. jaisa k SAAGAR SADIQUI baray karb se keh gay haiN
yeh dard k Tukray haiN , ashaar nahi SAGAR
Hum kaanch k dhaagay meiN zakhmoN ko pirotay haiN
Khush naseeb hotay haiN woh log jo apnay jazbaat, ehsasaat, seene meiN shor machatay junoon ko alfaaz meiN dhaal lete haiN to dard kuch kam ho jata hai ya yooN kahiay k uski shiddat ka ehsaas kuch had tak kam ho jata hai. SHAKEEB JALALI kehtay haiN
Ek hashar sa bapa tha mere dil mein ay SHAKEEB
kholi jo khiRkiyaN to zara shor ghaT gaya
Iss thread mein karna yeh hai k hum rozana aik kaifiyat ya halat dein gay jis par aap ne zyada se zyada ashaar post karne haiN. Yeh kaifiyat ya halat kisi khaas lafz ki soorat bhi ho sakti hai .. to aap k ashaar mein woh alfaaz aanay zaroori haiN. jitna guR utna meetha... jitnay ashaar, utnay number.
Aaj ki kaifiyat ya halat hai
masrofiyat
iss lafz ka sher mein aana zaroori nahi hai.
braaey mehrbani agar aap kisi ko TAG kareN to lambi si list laganay ki zarorat nahi hai. Sirf dilchaspi lene walay chand members ko hi tag kijiay.
Award kisay milay ga..... is ka faisla aakhir mein ho ga. 30 November tak yeh Thread chalay ga.
Wa Alaykum Assalam Wrwb
bohot acha silsila shuru kiya hai mohtarma aap ne
kya ashaar khud k hone chahiye?
waise ye race wale khel se ham door hi rehte hain lekin jitna ho sake uta baithe baihte daud lagayenge in sha Alalh